పర్యావరణ పరిరక్షణ పట్ల అవగాహన, ఆసక్తి ఉన్న ఎంతోమంది దాని కోసం ఎంతో కృషి చేశారు. అయితే వెలుగులోకి వచ్చినవారు మాత్రం కొందరే.
ఉదాహరణకు దాదాపు ఇరవై ఏళ్ల క్రితం చెన్నైకి చెందిన సుబ్రమణ్యన్ అనే బ్యాంక్ ఉద్యోగి, మాధవన్ అనే డాక్టరు... ఇద్దరూ కలిసి ఉదయాన్నే మొక్కలతో నిండిన రిక్షాని తొక్కుతూ వీధివీధి తిరిగేవారు. ఎక్కడ స్థలం దొరికితే అక్కడ మొక్కలను నాటారు. అయితే మొక్క ఎవరింటి ముందు నాటారో ఆ ఇంటి వారిని కలిసి, 'ఈ మొక్కకు మేము రోజూ నీళ్లు పోస్తాం' అని వారి నుంచి మాట తీసుకునేవారు.
కొంతమంది ఒప్పుకుంటే మరి కొంతమంది వీరిని పిచ్చివాళ్లుగా చూసి నవ్వుకునేవారు. అక్కడితో వదిలెయ్యకుండా మాధవన్, సుబ్రమణ్యన్‌లు అప్పుడప్పుడు వచ్చి 'మొక్కలకు ఆ ఇంటివారు నీళ్లు పోస్తున్నారా? లేదా?' అని చూసి వెళ్లేవారు. వీరి మంచి పనిని గమనించిన యునెటైడ్ ఇండియా ఇన్సూరెన్స్ కంపెనీ వారు చెట్లను పశువుల నుంచి సంరక్షించడానికి చుట్టూ తీగలను ఏర్పాటు చేసేందుకు ముందుకొచ్చారు.
ఆ తర్వాత వీరు 'గ్లోబల్ గ్రీన్‌వేస్' అనే స్వచ్ఛంద సంస్థను ఏర్పాటుచేశారు. ఇరవై ఏళ్ల క్రితం వారు నాటిన మొక్కలు ఇప్పుడు అందరికీ 'నీడనిచ్చే చెట్లు' గా మారాయి. బంజరుభూమిగా మారిపోతున్న చెన్నైలో ఈ సంస్థ కారణంగానే పచ్చదనం కనిపిస్తోందని, వారి పనిని మెచ్చుకుంటూ జనాలు తృప్తిగా చెప్పుకుంటున్నారు.
కామెంట్‌లు లేవు:
కామెంట్‌ను పోస్ట్ చేయండి