మానవుడు మహనీయుడే, కానీ మహా బద్ధకస్తుడు కూడా. కనీస ప్రయత్నం చెయ్యకుండా, మనకు అవకాశం వున్నా సరే....

*మానవుడు మహనీయుడే, కానీ మహా బద్ధకస్తుడు కూడా. కనీస ప్రయత్నం చెయ్యకుండా, మనకు అవకాశం వున్నా సరే, సులభంగా (పాపం) అవకాశం లేని వారికోసం ఏర్పాటు చేసిన సౌకర్యాలను అన్నీ మనం హాయిగా వాడేసుకుంటాం, పాపం చివరికి అవసరమైన వారి అవసరానికి వనరులు ఉండవు.* ఇప్పుడు అసలు విషయంలోకి వద్దాం

రోజూ కనీసం 5 నుంచి 10 మంది అత్యవసరంగా రక్తం కావాలి అని ఫోన్ చేస్తుంటారు. వారు అప్పుడున్న మానసిక స్థితిని, అవసరాన్ని మేము అర్ధం చేసుకోగలము. కానీ మన (దాతల) దగ్గర పెట్రోల్ బావులు లాగా లాగా రక్త బావి (నిధి) ఏమి ఉండదు కదా!, పాపం రక్త దాత కూడా 3 నెలలకు ఒకసారి మాత్రమే ఇవ్వగలరు. *ఇలాంటి అవకాశం పల్లెటూర్ల నుంచి వచ్చే వారు, చదువు రాకుండా, సర్కిల్ లేకుండా, ఊరు కాని ఊర్లో ఎవరు తెలియక వుండే వారికోసం, కానీ చదువుకుని, స్నేహితులు, బంధువులు, సాటి ఉద్యోగస్తులు తెలిసినవారు కనీసం ప్రయత్నం కూడా చెయ్యకుండా మాకు ఫోన్ చేస్తూ ఉండడం కొంత బాధ్యతారాహిత్యాన్ని సూచిస్తుంది.*

సినిమా కోసమో, IPL టికెట్స్ కోసమో, పార్కులకు, షికార్లకు వెళ్లడం కోసమో ఫ్రెండ్స్ ని మొహమాటం లేకుండా అడుగుతాం కదా లేదా పండగలకో, ముఖ్య దినాలకో లేదా గుడ్డు మార్నింగ్ అనో, నైట్ అనో ఎన్నో మెసేజ్ లు వాట్సాప్ లో పోస్ట్ చేస్తాం; అలాగే జలుబు చేసిందనో, *తోక ఎత్తిన కాకి, తోక దించిన కాకి అనో సోషల్ మీడియా లో ఎన్నో అప్డేట్స్, పోస్ట్స్ పెడుతూ ఉంటాము కదా...*

*మరి మన వారికి సాయం చెయ్యమని అడగడానికి ఎందుకు సిగ్గు?* ఇస్తారా, ఇవ్వరా, ఇవ్వడానికి వారికి ఆశక్తి ఉందా, అర్హత ఉందా అనేది తరువాత విషయం.. అసలు పొరపాటున కూడా ఎందుకు మనం ప్రయత్నం చేయడం లేదు? ఎవరికి వారు పదే పదే ప్రశ్నించుకోవాలి...

*పోనీ ఎదో విధంగా మన వల్లనో, NGO ఫ్రెండ్స్ వల్లనో, ఎవరో తెలియని వ్యక్తి వచ్చి రక్త దానం చేయడం వలన, మనం అవసరం నుంచి గట్టెక్కామ్. మరి తరువాత మనం రక్త దాతగా మారి కనీస కృతజ్ఞత తెలియ చేస్తున్నామా? లేక నాకు ఆఫీస్ ఉందనో, రక్త ఇవ్వాల్సిన హాస్పిటల్ దూరంగా ఉందనో, ముందుగానే ఫిక్స్ చేసుకున్న ప్రోగ్రాం క్యాన్సల్ చేసుకోవడం ఇష్టం లేకో వంద కారణాలు చెప్పి తప్పించుకుంటాం. లేదంటే ప్రాణ భయం... మన రక్తం తీసి, మనల్ని చంపి ఇంకొకర్ని బ్రతికించరు మహా ప్రభో. ప్రతి 3 నెలలకు ఒక సారి ఈ రక్త కణాలు ఎలాగూ నిరుపయోగంగా చనిపోతాయి. రక్తం ఇవ్వడం వలన నీ ఆరోగ్యం ఏమి పాడైపోదు, నీ ఆస్తి మొత్తం ఏమి కట్ట కట్టుకొని పోదు. ఇంకా నీకు హార్ట్ ఎటాక్ రాకుండా ఉండడం, ఆరోగ్యంగా ఉండడం లాంటి ఎన్నో ఉపయోగాలు ఉన్నాయి. మిడి మిడి జ్ఞానంతో ఆలోచించక, పూర్తిగా రక్త దానం గురించి తెలుసుకోండి, రక్త దాతలుగా మారండి. ప్రపంచంలో దేవుని తరువాత, మళ్ళీ ప్రాణం పోసి బ్రతికించగలిగే అర్హత, అవకాశం డాక్టర్ కి, రక్త దాత కి మాత్రమే ఉంటుంది.*

ఏం మీకోసం బ్లడ్ ఇచ్చిన వారికి ఇవన్నీ ఉండవా? వారు మనలాగా మనుషులే కదా? *నిజమే..లే... వారు మానవత్వమున్న మహానుభావులు. మరి మనం? మనిషి ముసుకు కప్పుకొని, బాధ్యత మరిచి, తీసుకోవడమే కానీ, ఇచ్చే అలవాటు లేని మహా "మనీ"షిలం*

రక్త దాతలారా ఇలాంటి స్వార్థ పూరిత సమాజంలో కూడా *నిస్వార్థంగా మీరు ఎంతో మంది ప్రాణాలు కాపాడుతున్నారు. ఒక్క సారి మాత్రమే కాదు, ప్రతి 3 నెలలకు తప్పని సరిగా రక్త ఇచ్చే వారు ఎంతో మంది నాకు వ్యక్తిగతంగా తెలుసు. వారు సుదూర ప్రాంతాలకు ఆఫీస్ లకి సెలవు పెట్టి మరీ వెళ్లి రక్త దానం చేసి ప్రాణాలు కాపాడుతున్నారు.* మీరు దైవ సమానులు..కాదు కాదు.. దైవ స్వరూపులు.

*మీరు లేదా మనం ఈ పని చేస్తే సరిపోదు, ప్రతి ఒక్కరిలో ఆలోచన రేకెత్తించాలి, మనల్ని రక్తం అడిగిన వారికి రక్తం ఇచ్చి వచ్చేయక, వారి చుట్టూ ఉండేవారినుండి వారు కూడా తప్పక రక్త దానం చేస్తామని మాట తీసుకోవాలి. వారి పరిధిలో వారు రక్తం కోసం ప్రయత్నించారా లేదా అని ప్రశ్నించాలి, అలా వారు చెయ్యకపోతే తప్పు చేస్తున్నామనే భావన వారికి కలగాలి.*

ఆలోచించండి.... ఆచరించండి.... ప్రచారం చేయండి... ప్రతి ఒక్కరు రక్త దాతగా మారే విధంగా అవగాహన కలిగించండి, కృషి చెయ్యండి.


నా అనంతరంగం...మీ అమ్మ శ్రీనివాస్  2018/10/07 10:30

శుభం భూయాత్..... నా రాతలు, మరిన్ని... http://ammasrinivas4u.blogspot.com/search/label/1.%20నా%20రాతలు%20%2F%20My%20Writtings?m=0